Website URL:
   BBC News, සිංහලඅන්තර්ගතයට පිවිසෙන්න
   (BUTTON) අංශ
     * මුල් පිටුව
     * ශ්‍රී ලංකා
     * ලෝකය
     * විශේෂාංග

     * මුල් පිටුව
     * ශ්‍රී ලංකා
     * ලෝකය
     * විශේෂාංග

කොළඹ වරායේ වර්ජනය සහ ඉන්දීය සම්බන්ධය ගැන මේ කරුණු දැන සිටියාද ?

     * ෂර්ලි උපුල් කුමාර
     * BBC සිංහල

   3 ජූලි 2020
   කොළඹ වරාය

   කොළඹ වරායේ නැගෙනහිර පර්යන්තයේ සවිකිරීමට රැගෙන එන ලද නව ගැන්ට්‍රි දොඹකර තුනක් ජුනි 20 වැනිදා සිට ගොඩබෑමට නොහැකිවීම මුල් කරගෙන ආරම්භ කර තිබූ සේවක වර්ජනය ජූලි 03 වැනිදා දහවල් 12.00ට අවසන් කෙරුණි.

   සියලු දේශපාලන පක්ෂ වලට සම්බන්ධ වෘත්තීය එම වෘත්තීය අරගලය දියත් කරනු ලැබුවේ ඉල්ලීම් දෙකක් මුල් කර ගනිමිනි.

   එම ඉල්ලීම් වන්නේ:
     * කොළඹ වරායේ නැගෙනහිර පර්යන්තයේ පුර්ණ අයිතිය ශ්‍රී ලංකාව සතු විය යුතු අතර එහි මෙහෙයුම් ක්‍රියාත්මක කළ යුත්තේ වරාය අධිකාරිය විසින් පමණි.
     * වරායට රැගෙනවිත් තිබෙන නව ගැන්ට්‍රි දොඹකර තුන නැගෙනහිර පර්යන්තයේ සවි කිරීම සඳහා ගොඩබෑමට පියවර ගත යුතුය.

   වරායට රැගෙන එන ලද නව ගැන්ට්‍රි දොඹකර ගොඩබෑම දින 14ක් තිස්සේ ප්‍රමාද කිරීමට හේතුව ඉන්දියාවේ බලපෑමක් බව නැගෙනහිර පර්යන්තය සුරැකීමේ වෘත්තීය සමිති එකමුතුවේ කැඳවුම්කරු සංජය කුමාර වැලිගම බීබීසී සිංහල සේවයට කියා සිටියේය.

   "අපි අහන්නේ මෙතනට ගෙනල්ල දිනකට එක්කෝටි දස ලක්ෂයක් ගානේ දින 14ක් ප්‍රමාද ගාස්තු ගෙවමින් ඉන්නේ ඇයි ? දැන් අපේ රජයෙන් කියන්නේ ඉන්දියාවේ බලපෑමක් කියලා. අපි කියන්නේ ඉන්දියාවේ බලපෑමක් නෑ, එකඟතා ලියවිල්ලක් විතරයි අත්සන් කළේ. ගිවිසුමක් නෑ," යනුවෙන් සංජය කුමාර වැලිගම පැවසුවේය.
   කොළඹ වරාය

   වරාය වෘත්තීය සමිති නායකයන් සඳහන් කරන පරිදි මෙම අවස්ථාවේදී ශ්‍රී ලංකා රජයට ඉන්දියාවේ බලපෑමක් තිබේද යන්න ගැන සහ කොළඹ වරායේ නැගෙනහිර පර්යන්තය සමඟ ඉන්දියාවේ කිසියම් සම්බන්ධයක් තිබේ දැයි බීබීසී සිංහල සේවය ශ්‍රී ලංකාවේ ඉන්දීය මහකොමසාරිස් කාර්යාලයෙන් විමසීමක් කළේය.

   මෙම ව්‍යාපෘතිය සහ ඉන්දියාව අතර ඇති සම්බන්ධය ශ්‍රී ලංකාව, ඉන්දියාව සහ ජපානය අතර අත්සන් කර ඇති සහයෝගිතා ගිවිසුමක දැක්වෙන අතර, ඒ ගැන ශ්‍රී ලංකා වරාය අධිකාරියේ වෙබ් අඩවියේ තොරතුරු සඳහන් වන බව බීබීසී ය කළ විමසුමට ප්‍රතිචාර දක්වමින් ඉන්දීය මහකොමසාරිස් කාර්යාලයේ දෙවන ලේකම් (මාධ්‍ය තොරතුරු හා සංස්කෘතික)
   නේහා සිං ප්‍රකාශ කළා ය.

ඉන්දියාව සහ ජපානය සමග ශ්‍රී ලංකාව අත්සන් තැබූ ගිවිසුම

   කොළඹ වරායේ නැගෙනහිර පර්යන්තය ඉදිකිරීමට අදාළව ශ්‍රී ලංකා, ඉන්දීය සහ ජපාන රජයන් අතර 2019 මැයි මාසයේදී සහයෝගිතා ගිවිසුමක් [Memorandum of Cooperation] අත්සන් කර ඇත. රජයන් තුනක් අතර ඇතිකරගත් එම එකඟතාවය ගැන ශ්‍රී ලංකා වරාය අධිකාරියේ නිළ වෙබ් අඩවියෙහි 2019.05.27 වැනි දින ප්‍රකාශයට පත් කර ඇත.

   එහි දැක්වෙන්නේ කොළඹ වරායේ නැගෙනහිර පර්යන්තයේ අයිතිය 100%ක් ශ්‍රී ලංකා වරාය අධිකාරිය සතු වන බවය.

   එමෙන්ම නැගෙනහිර පර්යන්තයේ මෙහෙයුම් සිදු කිරීමට ඇති කරන පර්යන්ත මෙහෙයුම් සමාගමේ කොටස් හිමිකාරිත්වයෙන් 51%ක් ශ්‍රී ලංකාව සතු වන අතර ඉතිරි 49%ක් ව්‍යාපාර හවුල්කරුවන්ට හිමිවන බවය.
   වරාය සේවකයෝ

ශ්‍රී ලංකා වරාය අධිකාරිය සතු කොළඹ වරායේ පාලනය

   කොළඹ වරායේ ජයබහළු පර්යන්තය (JCT) ශ්‍රී ලංකා වරාය අධිකාරිය සතුවේ. දකුණු ආසියා පිවිසුම් පර්යන්තය (South Asia Gateway Terminals (SAGT) සහ කොළඹ ජාත්‍යන්තර කන්ටේනර් පර්යන්තය Colombo International Container Terminals (CICT) හි මෙහෙයුම් වලින් 15%ක් පමණක් ශ්‍රී ලංකා වරාය අධිකාරිය සතු වෙයි.

   ජයබහළු පර්යන්තයේ සවිකර ඇති දොඹකර වසර 30ක් පමණ පැරණි බව ද වරාය සේවකයෝ පවසති.

   එබැවින් කොළඹ වරායේ විශාල නැව් හසුරවමින් වැඩි ප්‍රතිලාභ අත්කරගැනීමේ අරමුණින් නැගෙනහිර පර්යන්තය East Container Terminal (ECT) ඉදි කර ඇත.

   නැගෙනහිර පර්යන්තයේ ගැඹුර මීටර් 18කි.

වෙනත් පර්යන්තයක සවිකිරීමට ඉල්ලුම් කළ දොඹකර තුනක්

   වරාය අධිකාරියේ කළමනාකාරිත්වය මත පමණක් මෙහෙයුම් සිදු කිරීමට අධියර 05 නමින් කුඩා පර්යන්තයක් සැදීමේ සැලැස්මක් පසුගිය කාලයේ ක්‍රියාත්මක විය. ඒ සඳහා ගැන්ට්‍රි දොඹකර තුනක් ශ්‍රී ලංකාව ඉල්ලුම් කර තිබු අතර පසුගිදා ශ්‍රී ලංකාවට රැගෙන එනු ලැබුවේ එම දොඹකර තුනයි.
   වරාය සේවකයින්ගේ උද්ඝෝෂණය

   මෙම ගැන්ට්‍රි දොඹකර පළමුව සැළසුම් කර තිබුණේ අලුතින් සාදන පර්යන්ත අධියර 05 හි සවිකිරීම සඳහා ය. මහින්ද රාජපක්ෂ දින 52 ආණ්ඩුව භාර ගන්නා විට එම ගිවිසුම අවලංගු කළ නොහැකි නිසා එම ගැන්ට්‍රි දොඹකර නැගෙනහිර පර්යන්තයේ සවිකිරීමට හැකි වන පරිදි නැවත වෙනස් කිරීමකට ලක් කිරීමට අදාළ සමාගමෙන් ඉල්ලා සිටි අතර, එලෙස සවිකිරීමේ පහසුවට වෙනස් කළ ගැන්ට්‍රි දොඹකර තුනක් ජුනි 20 වැනිදා ශ්‍රී ලංකාවට රැගෙන ආ බව
   නැගෙනහිර පර්යන්තය සුරැකීමේ වෘත්තීය සමිති එකමුතුවේ කැඳවුම්කරු සංජය කුමාර වැලිගම බීබීසී සිංහල සේවයට කියා සිටියේය.

සේවක විරෝධය අවසන්

   මෙම ගැටලුව මුල් කරගෙන වරාය සේවකයන් සතියක් පුරා විරෝධතා සිදු කළ අතර බලධාරීන්ගෙන් ඊට යහපත් ප්‍රතිචාරයක් නොලැබුණු බැවින් අලුතින් ගෙන්වන ලද දොඹකර මත නැග වෘත්තීය සමිති නායකයෝ තිදෙනෙක් උපවාසයක් ආරම්භ කළහ.

   ජූලි 02 වැනිදා කොළඹදී විරෝධතාවයක් ද පැවති අතර කොළඹ වරායේ සියලු සේවකයෝ වැඩ වර්ජනයට ද එක් වූහ.

   අග්‍රාමාත්‍ය මහින්ද රාජපක්ෂ සහ වෘත්තීය සමිති නියෝජිතයන් ජූලි 03 වැනිදා පැවති සාකච්ඡාවකින් අනතුරුව මෙම වෘත්තීය සමිති ක්‍රියාමාර්ගය අවසන් කෙරිණ.

   අග්‍රාමාත්‍යවරයා සමග පැවති සාකච්ඡාවෙන් අනතුරුව හිටපු අමාත්‍යවරයෙකු වූ ගාමිණී ලොකුගේ මෙලෙස අදහස් පළ කළේය.

   "වරායේ බාන්නේ නැති දොඹකර බාන්නත්, ඉදිරියේදී මේ තියෙන ගිවිසුම් කැබිනට් එකට ආවම සාකච්ඡා කරලා ඒ පිළිබඳව විසඳුම් ලබා දෙන්නත් අගමැතිතුමා පොරොන්දු වුණා," යනුවෙන් ඔහු කියා සිටියේය.

   ජූලි 03 වැනිදා පස්වරුවේ ගැන්ට්‍රි දොඹකර තුන ගොඩබෑම ආරම්භ කෙරුණි.
     * වරාය නගරය: "පර්චසයක් ලක්ෂ දෙසීයකට විකිණිය හැකියි"
     * හම්බන්තොට වරාය: "ඉන්දියාවත් අසීරුතාවකට පත්වේවි"

ප්‍රධාන පුවත

     *

ජනාධිපති ගෝඨාභය ඇත්තටම ආරක්‍ෂක ඇමති ද?
       2020 අගෝස්තු 14
     *

ට්‍රම්ප්, කමලා හැරිස්ගේ 'උප්පැන්නය' අවුස්සයි
       පැය 8 කට පෙර
     *

කොරෝනා සටනින් මිනිසාට ජය ලැබේවි ද?
       2020 අගෝස්තු 14

දැක්ම

     *

ජාතික ලැයිස්තුව: විමලතිස්ස හිමියන් සොයා පොලිසිය නිවසක් වටලයි
       2020 අගෝස්තු 11
     *

ජාතික ලැයිස්තු මන්ත්‍රීවරුන් පත්කිරීම ගැන 'අර්බුදයක්'
       2020 අගෝස්තු 10
     *

මහින්ද රාජපක්ෂ සිව් වන වරටත් අගමැති ලෙස දිවුරුම් දෙයි
       2020 අගෝස්තු 9
     *

ශ්‍රී ලංකාවේ නව රජය හමුවට මුලින්ම එන අභියෝග
       2020 අගෝස්තු 7
     *

2020 මහ මැතිවරණයේ මූලික ඡන්ද ප්‍රතිඵල අනුව පොහොට්ටුවට විශිෂ්ඨ ජයක්
       2020 අගෝස්තු 6
     *

2020 පාර්ලිමේන්තු මැතිවරණය: මැතිවරණ දිනයේ පෙළ ගැසීම් 
       2020 අගෝස්තු 5
     *

''ගෝඨාභය බලයට පත් කළේ මේවා රකින්න මිසක් විකුණන්න නෙමෙයි''
       2020 ජූලි 22
     *

කෝවිඩ්-19 මාර්ගෝපදේශ නීතිගත කළ යුත්තේ ඇයි? - PHIවරු කියන කතාව
       2020 ජූලි 17
     *

''සෞඛ්‍ය රෙගුලාසි අනුගමනය කළේ නැතිනම් ඡන්දය තියන්න බෑ''
       2020 ජූලි 16

වැඩිපුරම කියැවූ

    1. 1
       ජනාධිපති ගෝඨාභය ඇත්තටම ආරක්‍ෂක ඇමති ද?
    2. 2
       ටී රෙක්ස් වර්ගයේ නව ඩයිනසෝරයෙක් සොයා ගනී
    3. 3
       කොරෝනා සටනින් මිනිසාට ජය ලැබේවි ද?
    4. 4
       ට්‍රම්ප්, කමලා හැරිස්ගේ 'උප්පැන්නය' අවුස්සයි
    5. 5
       ශ්‍රී ලංකාවේ සුවිශේෂී කාන්තාවන් 12 අතරට ගිය කස්තුරි චෙල්ලරාජා විල්සන්

   BBC News, සිංහල
     * ඔබට බීබීසී විශ්වාස කළ හැක්කේ ඇයි
     * භාවිතයේ කොන්දේසි
     * පෞද්ගලිකත්ව ප්‍රතිපත්තිය
     * කුකීස්
     * බීබීසී අමතන්න
     * AdChoices / Do Not Sell My Info

   © 2020 BBC. බාහිර වෙබ් අඩවිවල අන්තර්ගතයට බීබීසී වගකියනු නොලැබේ. බාහිර යොමු කෙරෙහි අපගේ ප්‍රවේශය ගැන කියවන්න.